Aðalfundur Snarfara 2025

Kæru Snarfarafélagar.

Aðalfundurinn var með nokkuð hefðbundnu sniði í ár. Formaður las skýrslu stjórnar þar sem farið var yfir atburði síðasta árs og var svo opnað á spurningar úr sal þar sem spurt var t.a.m. út í Viðey, félagsheimilið, traktorinn o.fl.

Fjármálastjóri félagsins fór yfir ársreikninginn og tók á móti spurningum varðandi hann. Félagið stendur vel fjárshagslega og gengur vel að spara þar sem hægt er að spara. Einnig á félagið umtalsvert safn eigna, lausafé og er skuldlaust.

Gerðar voru breytingar á nokkrum liðum í gjaldskrá félagsins:

• Félagsgjald hækkar úr 12.000 kr. í 15.000 kr.
• Aðstöðugjald báta að 12m hækkar úr 37.000 kr. í 40.000 kr.
• Aðstöðugjald báta stærri en 12m hækkar úr 47.000 kr. í 50.000 kr.
• Rafmagn hækkar úr 20 kwh í 25 kr. Kwh.

Ástæða hækkana er í raun ákvörðun um að hækka frekar í smáum skömmtum og þá tíðar heldur en sjaldnar í stærri þrepum. Félagið vilji halda jafnvægi við þær verðhækkanir sem eru í landinu t.a.m. á raforkuverði.

Enn eigi eftir að framkvæma mikið og ekki standi til að taka nein lán.

Kosning til stjórnar fór fram og helst stjórn óbreytt frá síðasta tímabili.

• Formaður: Hafþór Lyngberg Sigurðsson
• Varaformaður: Valgeir Berg Steindórsson
• Tveir meðstjórnendur: Hörður Már Harðarson og Ólafur A. Viggósson
• Varastjórnendur: Jón Rósmann Mýrdal, Jónas Hermannsson og Pétur Örn Valmundarson

Ekki bárust aðrar tillögur eða framboð og voru því stjórnarmenn sjálfkjörnir.

Að lokum verður hér stuttlega farið yfir svör við þeim spurningum sem komu upp í liðnum Önnur mál:

• Nú hefur loksins félagsheimili verið tengt alnetinu með ljósleiðaratengingu frá Símanum og er því von á því að félagsmenn fari að geta tengst myndavélakerfi á Snarfarasvæðinu að heiman. Stjórnin mun taka þetta saman og gefa út upplýsingar og leiðbeiningar á næstunni.
• Snarfari fagnar 50 ára afmæli í haust og hefur verið sett á laggirnar afmælisnefnd sem mun sinna skipulagningu á þeim afmælisviðburðum sem stendur til að halda. Fyrir nefndinni fer Ásgrímur Guðmundsson og óskar stjórn eftir fleirum sem bjóðast til að aðstoða við skipulagningu.
• Athugasemd barst varðandi 8.gr. laga félagsins barst um að þyrfti mögulega skýrara orðalag á greininni og var samþykkt að stjórnin tæki það til skoðunnar.
• Þó sumaropnun hafnar sé auglýst þann 1. apríl nk. þá er ekkert því til fyrirstöðu að byrja að undirbúa vorið örlítið fyrr ef veður og sjólag er gott.
• Félagatal er í prentun og verður gefið út á afmælisárinu.
• Ábending barst frá félagsmanni um nýjan veruleika að nú sé risin heilmikil byggð umhverfis athafnarsvæði Snarfara og því þurfi að taka tillit til þess og t.d. uppkeyrslur á mótorum eigi sér ekki stað seint á kvöldin eða nóttunni.

Ekki bárust fleiri spurningar, ábendingar né athugasemdir. Að venju var boðið upp á kaffiveitingar í lok fundar og lág vel á félagsmönnum eftir fundinn í nýuppgerðu félagsheimili okkar.

Stjórn Snarfara þakkar þeim liðlega 60 félagsmönnum sem mættu í félagsheimilið á fimmtudagskvöldið sl. og lá við loforðum um betra veðurfar þetta sumarið heldur en á því síðasta.

Fundargerð aðalfundar verður gerð aðgengileg á heimasíðu á næstu dögum.

Snarfari 50 ára!